Biography

1962లో ఉజ్జయినిలో "కాళిదాస్ సమారోహ్" పేరుతో జాతీయ స్థాయిలో సంస్కృత నాటక పోటీలు జరిగాయి. శ్రీ సంపత్ కుమార్ గారు తన గురువైన శ్రీ పేరి నరసింహ శాస్త్రి గారితో చర్చించి విజయనగరం సంస్కృత కళాశాల అధ్యాపకులను, విద్యార్థులను కలువుకొని కాళిదాస విరచిత "అభిజ్ఞాన శాకుంతలం" కావ్యాన్ని నృత్య నాటికగా రూపొందించి ఆంధ్ర రాష్ట్రం తరఫున ఉజ్జయిని పోటీలలో పాల్గొన్నారు. ఆ నాటికలో కణ్వమహర్షిగా శ్రీ పేరి నరసింహశాస్త్రి గారు నటించగా దుశ్యంతునకు అంగుళీకము చూపే జాలరివాని పాత్రను సంపత్ కుమార్ గారు పోషించారు. ఆ ప్రదర్శనకు విచ్చేసిన భారత రాష్ట్రపతి శ్రీ సర్వేపల్లి రాధాకృష్ణగారు ప్రదర్శన అనంతరం మొదటి బహుమతిగా సువర్ణ కలశాన్ని విజయనగరం గీతా నృత్య కళాశాలకు అందించి, సంపత్ కుమార్ గారి ప్రతిభను మెచ్చుకుని. వారికి "ఆంద్ర జాలరి"గా నామకరణం చేసారు. అదే సంవత్సరం ఈ రూపకాన్ని హైద్రాబాదు రవీంద్రభారతిలో పండిట్ జవహర్లాల్ నెహ్రు గారి సమక్షంలో కూడా ప్రదర్శించారు. ఆనాటి నుండి సంపత్ కుమార్ గారు తన విజయ పరంపరలో ఏనాడూ వెనకకు తిరిగి చూడలేదు. కళారాధనలో ఏనాడూ రాజీ పడలేదు. నృత్య దర్శకత్వంలో తనదైన పంథాను ఏర్పరుకుని ఎన్నో నృత్యరూపకాలకు జీవం పోశారు. 1963లో కలకత్తాలో శ్రీ రవీంద్రనాథ్ ఠాగూర్ రచనలపై జరిగిన పోటీలలో విజయనగరంనుండి గీతా నృత్య కళాశాల ఆధ్వర్య లో పాల్గొని, రవీంద్రుడు రచించిన "కాబూలీవాలా" ను తెలుగులో నృత్యరూపకంగా మలచి , కాబూలీవాలా పాత్రని తానే పోషించి ప్రధమ బహుమతి అందుకున్నారు. ఇదే పరంపరలో మేనకావిశ్వామిత్ర, మహిషాసురమర్ధిని, శివపార్వతి మొదలగు నృత్యరూపకాలు రూపొందించి దేశవ్యాప్తంగా పలు ప్రదర్శనలిచ్చారు. 1969లో వ్యాపారనిమిత్తం పిఠాపురం వెళ్లిన సంపత్ కుమార్ గారు అక్కడ శ్రీ రంగనాయకులు శ్రీమతి జగదీశ్వరి దంపతుల ప్రధమ పుత్రిక అయినా ఉమామహేశ్వరి గారిని ద్వితీయ వివాహం చేసుకుని విజయనగరం తీసుకుని వచ్చారు. ఆమెకు కూడా స్వతఃసిద్ధంగా నాట్యకళపై మక్కువ ఉండుటవలన ఆమెకు స్వయంగా శిక్షణ ఇచ్చుటయే కాక శ్రీ వేదాంతం ప్రహ్లాదశర్మ గారు, శ్రీ వెంపటి చినసత్యం గారు , శ్రీ సి రామ్మూర్తి గారు, శ్రీమతి ఉమారామారావు గారు వద్ద కూడా శిక్షణ ఇప్పించారు. సంపత్ కుమార్ గారి నైపుణ్యానికి శ్రీమతి ఉమా సంపత్ గారి నాట్య లావణ్యం తోడైయ్యింది. ఇరువురు కలసి కన్నులపండుగగా ఇచ్చిన ప్రదర్శనలకు ప్రజలలో మంచి ఆదరణ లభించింది. దేశవ్యాప్తంగా అనేక ప్రదర్శనలిస్తూ నటరాజ సేవలో లీనమయ్యారు ఈ పుణ్య దంపతులు.